Mō te tūnga | About the role 
Ko te tūranga Kaiārahi Reo me ngā Tikanga he mahi tautoko i te Ranga Toi Tangata kia ū te reo me ngā tikanga Māori ki roto i ngā whakahaere o Whakaata Māori. Mā te Kaiārahi Reo me ngā Tikanga Māori e arataki, e tohutohu, e tautoko ngā ranga katoa o Whakaata Māori i roto i ngā āhuatanga o te reo me ngā tikanga Māori.  Ko tāna anō he whakatinana i te mahere rautaki a Whakaata Māori, e kīia ana ko Te Huapae. 

Ngā kawenga matua | Key responsibilities 

Ko tā te tangata ka kopoua ki tēnei tūranga he: 

• arotake, he whakatakoto huarahi hei whakapakari ake i te taha ki ngā tikanga Māori ki roto i ngā mahi me ngā whakahaere o Whakaata Māori 

• whakarite mahere ako hei whakangungu, hei whakapakari i ngā kaimahi  

• whakahaere akoranga tikanga mā ngā kaiārahi me ngā kaiwhakahaere 

• whakahaere wānanga tikanga hei tautoko i ngā kaimahi kia piki te mōhiotanga, te raukaha me te āheinga ki te whakatinana i ngā tikanga Māori 

• whakamāori, whakapākehā, aroturuki hoki i ngā tuhinga me ngā huapāho 

• mahi ngātahi ki ngā hoa kōtui o te rāngai reo Māori, me te rāngai pāpāho Māori 

• tuhi pūrongo, he whakatutuki whāinga, he kawe kaupapa kia hāngai ki te tahua me te wātaka ka whakaritea 

• tautoko i ngā kaimahi ki te whakatinana i ngā uara o Whakaata Māori 

Ngā pūkenga me ngā wheako | What you’ll bring 

Kei te rapuhia he tangata: 

• taunga, waia hoki ki te ao Māori 

• whai tohu mātauranga reo Māori, tikanga Māori, kaupapa Māori rānei 

• kua whā tau e mahi ana ki tētehi momo tūranga ōrite ki tēnei nā 

• matatau ki te reo Māori me ngā tikanga Māori 

• tohunga ki te whakahaere kaupapa, he mātau ki te whakawhitiwhiti kōrero, he pukumahi 

Ko ngā painga o te mahi ki Whakaata Māori | Benefits of Working with Whakaata Māori 

• ka tautokotia tō whakapakari i ō pūkenga mahi 

• e 5 ngā wiki hararei ina eke ki te 12 marama e mahi ana ki Whakaata Māori 

• he whakahekenga utu inehua hauora ki Southern Cross, he utu-kore te kano āraimate rewharewha, he tautoko nā te ratonga tohuora kaimahi (EAP – Employee Assitance Programme) 

Ko wai mātou | Who we are 
He wāhi motuhake tō Whakaata Māori hei tautoko i te whakarauoratanga o te reo me ngā tikanga Māori. I rewa i te tau 2004, he hua nō te whakaū a te Karauna i ōna haepapa hei tautoko i te rāngai pāpāho Māori hei whakatairanga i te reo me ngā tikanga Māori, he mārama ngā mahi a Whakaata Māori hei tautoko i ngā mahi whakarauora a te motu, e whakatinanatia ana i tēnei wā i raro i te Maihi Karauna (te rautaki whakarauora reo a te Karauna). Ka orua mai ko ngā mahi a Whakaata Māori i ngā hapori hei whakarauora i te reo Māori hei reo ora e kōrerotia ana e ngā whānau, ngā iwi, ngā hapū, ngā hapori reo Māori, ngā āpiti hoki puta noa i te motu. Ko ngā mahi ā-hapori nei ka whakatinanatia i raro i te Maihi Māori (te rautaki reo Māori a ngāi Māori, ngā iwi me ngā hapū).  

Tono mai ināianei | Apply now 
Mehemea e rite ana koe ki te piki mai hei kaihoe i te waka o Whakaata Māori kia mauriora te reo me ngā tikanga Māori, tēnā tukua mai tō tātai pūmanawa me tō reta tono.